Mjeku Adriatik Berisha dje u pa teksa i qëndronte pranë ish-presidentit Hashim Thaçi, i cili erdhi nga Haga në vizitë te babai i tij i cili ndodhet i shtrirë në QKUK. Madje, ai ishte i vetmi që u lejua t’ia shtrëngojë dorën dhe ta përshëndes ish-presidentin.

Përmes një shkrimi në profilin e tij në Facebook, Berisha ka bërë të ditur se këto ditë si mjek në fushën e Hematologjisë, i ka shërbyer edhe Haxhi Thaçit, babait të Hashim Thaçit.

Ai ka dhënë detaje mbi gjendjen e tij, duke thënë se babai i Thaçit tash e disa javë është në gjendje të rënduar shëndetësore, me disa sëmundje shoqëruese.

“Sigurisht që pacientit i kam qëndruar afër dhe jam konsultuar në aspekt profesional hematologjik sa herë qe ka qenë e nevojshme e për shkak të gjendjes edhe dje e kisha për detyre ti qëndroj afër e ta shoqëroj gjatë gjithë vizitës së birit të tij ish-presidentit Thaqi.

Qëndroj i palëkundur, krenar e profesionalisht korrekt gjithmonë , në çdo kohë e në çdo situatë ashtu siq kanë qëndruar dhe prindërit e mi gjithmonë. Të dashur miq, historia e shtetit të Kosovës është e shkruar me tri shkronja të arta dhe përherë do mbetet ashtu”, ka shkruar ai.